RSS

You are here

I Mihajlovićka e EIB-eja: Nakha ano lačardipe auto-dromi Niš-Merdare-Priština

I Telopresidentka Thagarutna Srbiaki thaj ministarka vaš lačardipe,dromutnipe thaj infrastuktura, prof.dr Zorana Mihajlović, hramisarda avdive e Evropaka investiciake banka kontrakti kotar udžilje, molipa 100 milijojna evrja, thaj kontrakti kotar investiciako granti, molipe 40,6 milijojna evrja vaš lačardipe auto-drom Niš-Merdare-Priština. Kontraktja uzo telopresidentka Mihajlović hramisarde ini Migel Morgado, direktori sektoresko vaš Italia, Malta, Slovenia, Kroacia thaj Rjačutno Balkani (EIB), Jadranka Joksimović, ministarka vaš EU integracie, thaj Dušan Purić, ažutno direktori "Koridora Srbije".

 

I Mihajlovićka vaš akava phendja kaj ano gatisaripeakale projektesko kerdilo trin berš, thaj ini kaj sine aver aver kritike, pedi iniciativa odole vakhtune presidento Thagarutnako Aleksandar Vučić lelilo projekti lačardipe"auto-drom tehnipasko", dikhipa pedo olesko semnipe.

 

"Akava projekti sito semno na numa vaš ekonomikano barjaripe Srbiako thaj phandipe dizutnengo ano disave regiojna, več ini politikano, vaš stabilipe ano regioni, soske sikhavela  manglipe amara phuvjako te barjarolpe, ama ini kaj dži ko agorisipe avelape kompromisea thaj maškharipa. Strategikane, akava auto-drom resela amenge iklovipe po derjav thaj porte",phendja voj.

 

I Mihajlovićka pana phendja kaj Thagarutni Srbiaki sitoj vaš phandipe e regioneja thaj maškharipe, thaj kaj ano akava thaj berš so avela ka lelpe lačardipe šov neve auto-dromja.

 

"Srbia avdive siola stabilno ekonomia thaj finansije, politikane sijam stabilno raštra savi sila kapacitetja te lel thaj te realizuinol bare infrastrukturake projektja. Manga te phanahape, te ova kotor EU, te ova moderno ekonomia, a sa ano interesi dizutnengo thaj olengo kvaliteti dživdipasko", phendja voj.

 

I Jadranka Joksimović phendja kaj akava semno dive vaš Srbia soske sakova investiripe ani infrastruktura nane fulimo lovo, več sito vaš mištipe dizutnengo thaj ano reso lačardipe kvaliteti dživdipasko sarenengo.

 

"Sine but polemike kotar semnipe akale auto-dromesko, ama sakoja raštra dženutni EU savi labardindja anglopašutnipaske  fondja ka phenol kaj investiripe ani infrastruktura nane fulimo lovo. Ani praksa, sikhava kaj sijam aktivno kotor transevropako sistemesko thaj phandipasko, so ka anol dži pobaro ekonomikano barjaripe, neve bukjake thana thaj pošukhar phandipe.Kotar akava projekti mištipe ka ovelolen saren, ini regioni ini EU, a majbut Srbia", phendja voj.

 

I Violeta Bulc, evropaki komesarka vaš transporti, bahtakerdja Srbiake thaj sa akterjenge ano akava projekti, phenipa kaj avdisutno hramosaripe kontraktesko kotar finansiripe auto-dromesko baro adamo vaš phandipe regionesko.

"Phandipe semninela tehnipe, manglipe thaj prosperoteti. Semno sito so dendjam phuvjenge ano regioni te phanenpe thaj te labarinen sa benefitja savo odova phandipe dela. Sijamen bare adžukharipe vaš regioni thaj ano duj dive so avena ka vakhara kotar šaipe podur maškharipasko thaj transportno phandipe", phendja komesarka Bulc.

 

O Migel Morgado phendja kaj EIB ka lungarol te dol dumo Srbiake vaš te anglunisarenpe konekcie andral phuv, regioni thaj e EU.

 

"Da dumo Srbiake but berša vaš te anglunisara transportno sistemi, ka lungara ini podur odova te kera, poulavdipe kana dikholape nevo investiciako ciklusi savo phendja kaj ka kerolpe o presidento Aleksandar Vučić. Manga te da kotor ano tumaro barjaripe, bufljaripe thaj prosperiteti Srbiako, phendja Morgado.

 

 Anglo hramisaripe kontraktesko kotar finansiripe auto-dromesko kotar Niš dži Priština, telopresidentka Thagarutnaki malavdisali e delegacia EIB thaj olenca vakhardja kotar lungaripe sar ano akava projekti, adžahar ini pedo neve projektja anu umal dromtnipe. sastrnalutnipe thaj pajnesko dromutnipe, savo ministribe lela te kerol.

 

Trasa avutne auto-dromesko kotar Niš dži Merdare lungi sitoj 77 km. Angluno kotor kotar Niš dži Pločnik lungo sito 33 km thaj adikharelape kaj molipe bukjengo pedo lačardipe poluprofilja, eksproprijacia thaj projektja sito paše 250 milijojna evrja. Dujto kotor kotar Pločnik dži Merdare lungo sito 44 km thaj molipe sito paše 570 milijojna evrja. Adžukharelape kaj bukja ani angluni trasa te lenpe ano paluno kvartali ano berš so avela.