RSS

You are here

Mihajlovićka: Agorisipe Koridori 10 sito generaciako labdaripe, ama nane ačhavipe!

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja ano intervju vaš "Srpski teklegraf" kaj Srbia pedo agorisipe Koridori 10 adžukhardja kotar 1970. berš, kana lačardilo angluno kilometari auto-drom ko Beogradi.

 

"Thaj amem ole agorisindjam, akava presidento Aleksandar Vučić, akaja Thagarutni Srbiaki, ministribe savo legarava, "Koridori Srbije" thaj sa amare bučarne bi savengo akava na ovelamen sine. Agorisipe akale projektesko sito generaciako labdaripe. Nane odova sasavo drom, soske Koridorea 10 Srbia biulavdipa phandili e Evropa. Agorisipa akava auto-drom Srbia sitoj bitrujalutno punkti thaj odova so o Cvijić definišindja sar "kher maškhar drom". Akava auto-drom sito barikano potenciali vaš podur ekonomikano barjaripe thaj šansa te ikala love thaj te inara investicie, soske akava berš adžukhara oleja te nakhen 60 milijojna automobilja, duj drom pobuder ze anglo pondž berš. Agorisipa Koridori 10 sikhavdjam ini amenge ini averenge kaj sijam gatisarime thaj kabilutne vaš majbare keripe", phendja i Mihajlovićka vaš avdisutno "Srpski telegraf".

 

Voj phendja kaj, uzo akava projekti, agorisimo ini auto-drom "Miloš Veliki" kotar Obrenovaci dži Čačak, sar kaj pobuder kotar 10 milijarde evrja ano berša save avena ka ovol investirimo ani inftastruktura.

 

"Nane bešipe! Dži po agor beršesko agorisina auto-drom kotar Surčin dži Obrenovaci thaj adžahar "Miloš Veliki" ana pedo pondž minutja e Beogradesta. Agorisina ini nevi purt prekal Sava ki Ostružnica thaj Ipsilon phak, jase trujalutno drom maškhar Subotica. La ini lačardipe pondž neve auto-dromja: Moravako koridori kotar Čačak prekal Kraljeva dži Kruševci, kotar Niš prekal Pločnik dži Merdare, auto-drom thaj sigutni dromutnikani kotar Ruma prekal Šabac dži Loznica, sar ini duj phaka auto-dromesko dži Sarajevo, kera auto-drom kotar Čačak dži Požega. Ka kera ini nevisaripe regionalno thaj lokalno dromja soske na dživdinena  numa manuša uzo auto-dromja. Manga kaj sakoja diz thaj sakova gav te ovelole lačhe droma, soske odova sito angločhinavdipe vaš te ačhon manuša", phenela i Mihajlovićka.