RSS

You are here

Mihajlovićka: Auto-drom kotar Beogradi dži Sarajeva vaš pošukhar avutnipe regionesko

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, hramisarda avdive e Saša Dalipagićea, javerutno ministresko vaš telekomunikacie thaj transporti BthajH, Halovipe maškhar Thagarutni Republika Srbia thaj Konsili ministarjengo Bosna thaj Hercegovina kotar maškharipe ani realizacia projektesko auto-drom Beograd-Sarajevo. Ano hramosaripe Halovipasko lela kotor ini ambasadorka BthajH ani Srbia Aida Smajić.

 

Mihajlovićka vaš odova phendja kaj akava Halovipe ka resol pisigipe thaj poefikasipe te lačarolpe auto-drom ki BthajH thaj lepardja kaj starti bukjengo ano oktobri kerdilo uzo leibe kotor presidento Srbiako thaj Turkiako, Aleksandar Vučić thaj Tajip Erdogan thaj dženutne BthajH.

 

“Bukja ani etapa Sremeski Rača-Kuzmin nakhena pedo kontraktesko plani thaj dinamika. Akava nane numa auto-drom, akava sito drom savo phanela duj raštre thaj manušen save ando olende dživdinena, drom savo manglape te legarelamen ano avutnipe, a na ano nakhlo vakhti savo sine pharikano problemjenca. Akava Halovipe ka resol te lungara bukja thaj te ikala urbanistikano mukhlipasko lil vaš lačardipe sa purtjako prekal Sava”, phendja voj.

 

Mihajlovićka pana phendja kaj pedo purt prekal Sava ka ovol ini  jekh samtrendjengo nakhavipe, thaj kaj odova ka resel posig nakhipe manušengo thaj robako, so sitoj ini politika presidenteski thaj Thagarutna Srbiaki.

 

Saša Dalipagić phendja kaj akava Halovipe sito vaš lačardipe duj etape auto-dromeske, jekh sito Tuzla-Brčko-Bijeljina-samatrenda e Srbia, a dujto Sarajevo-Pale-Višegrad-samatrenda e Srbia thaj podur dži Beograd.

 

“Halovipe anglodikhlarela ini lačardipe purt prekal Sava, savi ka lačarol Srbia, sar ini pučipe samatredjengo nakhipe. Ano roki kotar jekh masek ka formirina khupatno operativno trupo vaš po efikasno realizacia projektesko”, phendja o Dalipagić.

 

Ambasadorka BthajH ani Srbia Aida Smajić phendja kaj bare infrastrukturake projektja sikhavena šužo orjentacia duje raštrengo podrom ki Evropaki unia.

 

“Akava auto drom pana pobut ka phanol amare duj phuvja thaj dizutnen. Ov sito ini indikatori kaj amare bilateralno bukja džana uštipaske dromutnea, thaj kaj evropake integracie amaro strategiako reso, a kaj pana pošukhar phandipa regionesko ka ova gatisarime te ova pherdojuridikane dženutne EU”, phendja voj.