RSS

You are here

Mihajlovićka: Khaniči veke ani Srbia nane dur

Telopresidentka Thagarutna Republika Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, putardja, khupate e presidentea Republika Srbiako Aleksandar Vučićea, multimedialno ekspozita “Srbia 2019.- berš infrastrukturako: Khanči veke nane dur”, ano savi sikhavdile reslime rezultatja thaj neve projektja ano sektori infrastruktura, urbanizmi thaj dromutnipe.

 

Aleksandar Vučić phendja kaj ano nakhle pondž berša ani infrastruktura kerdilo pobuder ze vaš nakhle 40 thaj pobuder berša thaj kaj odova rezultati pedo barikanipe Thagarutna Srbiako thaj sarenengo ani Srbia. “Na lačarenape dromja, pruge thaj khera kokore pesta, daj dženo musaj odova te kerol thaj te resol love phare reformjenca”, phendja o Vučić.

 

“Barikano sim pedo sa so kerdjam thaj akharava manušen te aven dži purano kurko te dikhen akaja multimedialno ekspozita, te dikhen so kerdjam thaj so siton amare plajna vaš avutnipe”, phendja o Vučić thaj bahtakerdja Ministribaske pi organizacia ekspozitako.

 

Mihajlovićka phendja kaj olako angluni impresia kotar reslime rezultatja ani infrastruktura kaj palo sa so kerdilo khanči veke ani Srbia nane dur.

 

“Miri impresia sitoj kaj sijam sakole lačarde kilometrea auto-dromesko, e sakole kilometrea rehabilitimo prugako, e sakola neva linia “Er Srbia”, e sakole neve solitereja ano “Beogardi pedo pani”, e sakole dinareja investirimo ano pajnesko dromutnipe, inara adžukharipe thaj pakjavipe kaj Srbia šaj te kerol bare bukja”, phendja i Mihajlovićka.

 

Voj akcentirindja kaj 2019. berš rezultati sarenengo, soske rezultati ani infrastruktura rezultati ini politikako stabilipe Srbiako thaj olake budžetesko thaj finansijsko stabilipe thaj putaripe neve dokumentja ano vakheripe e Evropaka unia. ”Nais presidento Vučićeske, savo sine uzo amende ini sar president Thagarutnako ini sar presidento Srbiako, adžahar kaj avdive šaj te sikhava so kerdjam vaš dizutne Srbiake”, phendja i Mihajlovićka.

 

Ano lošalipasko putaripe ekspozitako ani Palata Srbia lele kotor dženutne Thagarutna Srbiake, dizakopočekatune thaj presidentja komunake, dženutne diplomatiako kori, dženutne raštrake institucienge thaj firmjenge thaj aver akhardutne.

 

Ekspozita sitoj ulavdi ano pondž tematikane sale, ano save sikhavde objektja, fotografie thaj filmja kotar investicie ano sa sektorja infrastrukturake, dromutnipaske  thaj lačardimaske.

 

Angluni sala akharela anav Koridori 10, dujto “Miloš Veliki”, dži trito sala sitoj kotar sastrnalutni. Štarto sala sitoj kotar avio-dromutnipe, a pondžto pajnesko dromutnipe thaj projekteske “Beogradi pedo pani”, sar ini investiripe ani komunalno infrastruktura. Adžahar ani ekspozita sikhavde siton ini apartmajna save lačarenape ano rami projektesko vaš kherutno lačardipe vaš dženutnenge ano zoralipe arakhipaske.

 

Ani sala Koridori 10, maškhar sa, šaj te nakhelpe prekal maketa tuneli Manajle thaj purt Vrla thaj te lenpe majsemne informacie phande e lačardipa akale auto-dromesko.

 

Kotar akaja sala khuvelape ani sala “Miloš Veliki”, kote siton informacie thaj fotografie kotar auto-drom kotar Beogradi dži Čačak, a kotor akala salako sito kotar srbikano thagarutno, knjazi Miloš Obrenović, pedo kaste o auto-drom lela  anav.

 

Ani sala Sastrnalutni, maškhar sa, šaj te hačarenpe sar dikholape tradipe neve pampurjenca pedo rekonstruišime pruge, te bešelpe ano vagon-restorani thaj te dikhelpe bari karta srbikane prugengo.

 

Ani sala avio-dromutnipe sikhavenape trin maškharthemutne aerodromja ani Srbia, istoria aerotradipasko thaj institucie ano aero dromutnipe, a poulavdipe interesantno siton simulatorja fulipe aeroplajnesko ano aerodromja.

 

Ani pondžto sala sikhavenape portja thaj berolačardipe ani Srbia, neve moderno sistemi thaj aparatja vaš vastalutnipe pajneske tradipa, a jekh kotor ani sala sito vaš investiripe ano komunalno infrastruktura, ano odova ini fabrike pajneske thaj sistemi mašinengo vaš šužaripe melale pajna, sar ini moderno sistemja vaš khedipe thaj recikliripe zoralikani gunoj.

 

Džene save avena ani ekspozita šaj te dikhen ini multimedijalno prezentacia “Beogardi pedo pani” thaj te nakhen virtuelno tura prekal bešipaskothan. Adžahar šaj te dikhen ini sar siton thana ano savo ka lačarenpe khera vaš dženutne askeriake, policiake thaj arakhipaske sevipe thaj te dikhen segementja ano apartmajna.