RSS

You are here

Mihajlovićka: Lačara 400 kilometarja neve auto-dromja

Telopresidentka Thagarutna Republika Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja avdive kaj Srbia uč lela jase gatisarinela te lačarol paše 400 kilometarja neve auto-dromja.

 

“Lelam bukaj ano Moravako koridori, lačara etapa Preljina-Požega ano auto-drom “Miloš Veliki”, savi ka ovol agorisimi 2022, a lačarelape ini auto-drom Sremeski Rača-Kuzmin, savi sitoj angluni etapa auto-dromeski Beograd-Sarajevo. Adžahar, ka la bukja ini ani etapa Niš-Pločnik, e kinaka kompania kera vakheripe kotare etapa Novi Beograd-Surčin, ani savi bukja šaj te lenpe ano akava berš. Gatisarelape ini projektno dokumentacia vaš nevo projekti Šumadiako koridori “Vožd Karadjordje””, phendja i Mihajlovićka dostuipa ano TV Hepi.

 

Voj phendja kaj ano nakhlo periodi nevisardilo pobuder kotar 500 km pruga, a kaj dži po agor 2021. berš ka ovol agorisimi ini angluni etapa sigutna prugako, sava vaš 25 minutja pampureja ka avolpe kotar Beogradi dži Novi Sad. “Ano Bareski pruga nevisardilo 77 km pruga kotar Resnik dži Valjeva, khupate e “Rusiake sastrnalutnenca” a majdur dži aver berš adžukhara kaj ka lungarolpe rekonstrukcia ini ano aver etape Bareski pruga, dži samatrenda e Crna Gora”, phendja i Mihajlovićka.

 

Voj phendja kaj naisaripe investiciengo ano pajnesko dromutnipe amare lejna vaš paše duj berš ka oven tradutne 365 dive ano berš, so momentalno nane. Soske ani akava sektori but berša nane investirisalo.

 

 “Ano 2014. berš investirisalo ano pajnesko dromutnipe 10 milijojna evrja, a avdive odova sito 340 milijojna, save investirina ani infrastruktura Dunavesko, Savako thaj Tisako, ano lačardipe thaj bufljaripe portjengo, maškhar aver ano Smederevo, Prahovo, Sremeski Mitrovica, ani rekonstrukcia beroski nakhavutne ano HE “Djerdap 1” thaj HE “Djerdap 2”. Ani Vranja maškhar marti ka ovol agorisimi anglune duj soliterja vaš dženutne arakhipaske zoralipe, a akana siton bukja ano pana disave dizja ani Srbia, a adžukhara sig  kaj ka putarelpe tenderi vaš anglune apartmajna ano Beogradi. Sa paše 8.000 apartmajna ka lačarenpe vaš dženutne zoralipaske”, phendja i Mihajlovićka. Voj phendja kaj odola apartmajna lačarenape pedo evropikane standardja, sar sakana kana lačarelape aver daj soliteri ano centri Beogradesko jase Nišesko, ama molipe sito potele  soske raštra sitoj pala akava projekti.

 

Mihajlovićka pana phendja kaj musaj te legarolpe logari kotar manuša save siton kvalitetno, ekspertja thaj džandutne, soske adžahar manuša mangenape Srbiake vaš te šaj te barjarolpe, sar ini kaj Thagarutni kerela pedo odova te kerenpe šartja kaj ano sakova kotor Srbiako dživdinelape pošukhar thaj sar tana nakhen o manuša avrijal.

 

“Elementarno šeja save mangenape vaš daj dženo te ačhol te dživdinol ano piri diz sito te khuvol pi buti thaj te ovol šukhar infrastruktura, šaj te ovol drom, sastrnalutni jase komunalno infrastruktura thaj odova sito pedo savo amen kera buti”, phendja voj.