RSS

You are here

Mihajlovićka lela kampanja “16 dive aktivizmi” ani Srbia

“Paše kvaš džuvlja ani Srbia, jase 1,7 milijojna olenda, siolen daj forma pedozoralipe, vakhara mi kotar fizikano, psihikano, ekonomikano jase kotar seksualno zumavipe thaj tradipe. Sa lumia ano 16 dive save avena, ini Srbia adžahar, ka čhivol pačiv pedo odova kobor pedozoralipe nane mukhlipasko thaj saren amen kupate opipe odova musaj te marahape”, phendja avdive  telopresidentka Thagarutna Srbiaki thaj presidentka Koordinaciako trupesko vaš njamesko jekh jekhipe, prof. dr Zorana Mihajlović.

 

Voj, phenipe kaj ka avol kampanja “16 dive aktivizmi opipe pedozoralipe pedo džuvlja”, phendja kaj pedozoralipe nakhavela institucie thaj kanunja, save siton harmonizuime e maškharthemutne dokumentjenca, kaj sito uči niveli stereotipjengo thaj anglokrisipengo, thaj musaj pana pobari edukacia, savo lelape kotar tiknoripe, kotar familia.

 

“Ano nakhle 11 berša 320 džuvlja mudardile ano familiako thaj partneresko pedozoralipe, 400 čhavore ačhile čorore. Saren amen khupate na kera amari buti ini kana numa jekh džuvli sitoj talo pedozoralipe, a tana vakhara kotar odova kana našalela po dživdipe. Džuvlja avdive siton pobut zoralikane te phenen kotar pedozoralipe, vakhara pobut kotar akaja tema thaj semno sito, na numa ano akala 16 dive, uč sa berš, te kera kotar odova te čhinava pedozoralipe. Nais medijenge soske dikhlarena akaja tema, logarina pedo tumaro devipedumo ini dži sitoj kampanja”, phendja voj.

 

Sem Fabrici, šefi delegaciako EU ani Srbia, phendja kaj pedozoralipe ne ovela numa ani Srbia, uč ano sa lumia, thaj saren amen  sar kolektivno, adžahar ini individualno amboldipe te kera diso vaš odova te čhina.

 

“Sar murš, ama ini sar rom, dad, phral thaj čhavo, ini sar dženutno EU, ka lungarav te dav reslipe marebake opipe pedozoralipe pedo džuvlja thaj čhajorja. Ano akava berš iklilam akale autobusjenca e semnipaske phenipa, te vazda godaripe kotar škodripe pedozoralipasko, savo siole aver aver forme, šaj te ovol ini ekonomikano phandipe, njamesko bi jekh jekhipe, bipašaripe sastipaske uluvipaske, ama ini seksualno thaj fizikano pedozoralipe”, phendja o Fabrici.

 

Jelena Sekulić kotar Agencia Khedutne naciengo vaš njamesko jekh jekhipe thaj zoralipe džuvljengo (UN Women) phendja kaj paše sakoja trito džuvlji ani lumia dži dživdisarela daj forma pedozoralipasko, thaj kaj UN Women ano maškharipe e Koordinaciake trupea thaj Delegacia EU ano akava berš ikaldja kampanja ano mahale, sar  te ini bufljardi publika ovela pendžardi e problemea pedozoralipasko.

 

“Semno sito kaj amare dizutne lena te pučhenpe thaj te gndisaren kana dikhena akala phenimata, soske daj dženo kotar olengo paše maškharipe viktimi pedozoralipasko. Sako amenda pendjarela daj džene ko sinole daj forma pedozoralipasko, kana dikha statistika”, phendja voj.

 

Globalno kampanja “16 dive aktivizmi” leparelape ano sa lumia thaj lelape 25. Novembrea Maškhathemutno dive maripe opipe pedozoralipe pedo džuvlja thaj agorisinelape e 10 decembrea, kana leparelape Maškharthemutno dive manušikane hakaja. Reso kampanjako sito vazdipe džanglipe publikako thaj te lenpe aktivipe vaš cidipe pedozoralipasko pedo džuvlja thaj čhajorja.