RSS

You are here

Mihajlovićka: Moravako koridori-investicia ano avutnipe dizutnengo Srbiako

Telopresidentka Thagarutna Republika Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, lela kotor avdive, khupate e presidentea Republika Srbiako Aleksandar Vučićea, ano leparnipe starti lačardipasko Moravako koridori, auto-drom 112,3 km, savo ka phanol Pojate thaj Preljina.

 

“Moravako koridori sito štarto auto-drom pedo savo la bukja ano akava berš, a angluno savo ka phenol javintno thaj rjačitno centralno Srbiako, Koridori 10 e auto-dromea “Miloš Veliki”. Akava projekti Srbiake sito strategiako semno soske sito but semno vaš 500.000 manuša save direktno phanela, vaš posig barjaripe dizjengo thaj komunengo prekal savo nakhela, ano odova ini Kruševac, Trstenik, Vrnjačka Banja, Kraljevo, Čačak, vaš pobut kotar 20.000 firme save kerena biznis ano akava regioni, ama ini vaš neve investitorja save šaj te logarinen kaj ini akate ka ovol auto-drom”, phendja i Mihajlović.

 

Voj pana phendja kaj lačardipe Moravako koridori tradipe prekal centralno Srbia ka ovol na numa po harno, uč ini po arakhadutno.”Kotar Beogradi dži Vrnjačka Banja šaj te avolpe paše jekh sati tekvaš, diso hari pobuder kotar jekh sati dži Kraljeva, vaš hari pobuder kotar jekh sati tekvaš dži Kruševci. Khanči veke nane dur thaj khanči naka ovol dur”, phendja i Mihajlovićka.

 

Telopresidentka Thagarutnaki pana phendja kaj Moravako koridori na semninela numa kaj akava kotor Srbiako angluno drom ka lel auto-drom, uč odova ka ovol ini digitalno koridori, ama ini agorisipe vaš problemja e bare pajnenca, soske ka kerolpe buti ini pi regulacia lejnengi. “Adžahar sito semno so ano akava projekti khuva šukhar gatisarime thaj so vaš strategiako partneri sijamen jekh kotar majbare lumiake kompanie, amerikaki “Behtel”, savi ka kerol khupate buti e turkiaka “Enke” thaj amare firmenca. Odova sikhavela kaj siklilam diso kotar nakhle projekatja thaj kaj na manga te kera palem doša, sar po misal e Koridorea 10, kote sinamen bilačhe projektja”, phendja voj.

 

Komercialno kontraktea vakhardilo molipe lačardipasko 112,3 km auto-drom kotar 745 milijojna evrja. Anglodikhlardile ini pana bukja thaj direktno thaj indirektno matrialno hardžipe kotar 20 šelestar.

 

Projekti lačardipe Moravako koridori anglodikhlarela kaj vaš duj berša Kruševci auto-dromea ovela phando e Koridorea 10, vaš pohari kotar trin berš Kraljevo thaj Čačak auto-dromea phanenape e “Miloš Veliki”, a kaj kompletno projekti ovela gaisarimo vaš štar berš.

 

Ani trasa auto-dromeski ka oven lačarde sa 11 kombo thaj 130 aver objektja, savenda 71 purt, 23 pedotradimaske droma, 2 talotradimaske droma thaj 31 mukhlutne.