RSS

You are here

Mihajlovićka: Moravako koridori te ovol misal sar te realizuinenpe bare projektja ani Srbia

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja avdive kaj Moravako koridori projekti investicia ano avutnipe Srbiako thaj kaj manglape te ovol misal sar šaj labdaripa te realizuinelpe jekh baro infrastrukturako projekti ani Srbia.

 

Mihajlovićka žurnalistjenge palo bešipe e dizakepočekatunenca thaj presidentjenca komunake prekal save ka nakhol Moravako koridori thaj regiojna savo akava auto-drom phanela, phendja kaj avdive kerdilo angluno khupatnikano halovipe phande akale projekteja savo ka pašarol pobuder kotar 700.000 manuša ano trin regiojna prekal savo nakhela.

 

“Adžukhara  kaj vaš duj berša ka phana Kruševci e Koridorea 10, Kraljevo e  auto-dromea “Miloš Veliki” vaš paše trin berš, a vaš štar berš sa auto drom kotar Pojate dži Preljina te ovol agorisimo. Džana kobor sinamen problemja ano disave poangle projektja thaj vaš odova na manga odola doš te kera palem, uč akava te ovol misal sar mangelape te realizuinolpe jekh baro projekti ani Srbia”, phendja i Mihajlovićka.

 

Direktori projektesko Moravako koridori, Endi Milunzi kotar kompania“Behtel”, phendja kaj akaja kompania barikani so si alosardi te realizuinol akava projekti thaj kaj adžukharela timeski buti thaj efikasno lačardipe auto-dromesko savo sito semno vaš dizutne Srbiake.

 

Dženo direkciako“Enke”,Ozger Inal, phendja kaj kerdutno bukjengo, konzorciumi”Behtel-Enke”ka kerol sa vaš projekti te ovol realizuimo ano vakhardutno budžeti thaj roki.

 

Branisalv Vesić, počekatuno Rasinesko regioni, phendja kaj regioni thaj diz Kruševac ka ovol šukhar kherutno thaj kaj dol sasavo suporti e kerdutnenge, sar ini kaj lačardipe Moravako koridori ka resol pobare bučaripaske thaj posig barjaripe ekonomiako.

 

Počekatuno Raškako regioni Nebojša Simović phendja kaj počekatune regioneske ka len amboldipe thaj ka legaren tikne timja save ka keren buti pi realizacia projektesko.

.

Počekatuno Moravičko regioni Slobodan Jolović phendja kaj Moravičko regioni thaj diz Čačak lačardipe Moravako koridori ovela but pošukhar phando thaj kaj Čačak ovela trito dromutnikano kombipe ani Srbia.

 

Dizakopočekatuni Kruševacesko Jasmina Palurović phendja kaj lačardipe Moravako koridori sikhavela reslipe butedekadengo suno dizutnengo ano Kruševci thaj kaj adikharela sa bukja ka kerenpe pedo plani.

 

Ano bešipe lele kotor ini dizakepočekatune  kotar Čačak thaj Kraljevo, sar ini presidentja komunake Ćićevac, Varvarin, Trstenik thaj Vranjačka Banja.

 

Lungipe auto-dromesko Pojate-Preljina sito 112,32 km, a maksimalno mukhlutno sigipa ano akava auto-drom ka ovol 130 km pedo sati. Planirimo te kerenpe 11 kombja thaj pana 130 objektja ani trasa auto-dromeski, odolestar 71 purt, 23 pedotradutne, pondž telotradutne thaj 31 mukhlutne.