RSS

You are here

Mihajlovićka: Na ka cidape kotar analiza sakova dinari vaš lačardipe Koridori 10

Telopresidentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja ano intervju vaš beogradeski “Politika” kaj na mangela te cidelpe kotar odova te dikhlarol sakova dinari savo hardžisalo ano lačardipe Koridori 10.

 

“Kotar odova na ka cidape. Analiza sitoj ano lačardipe, ama nane agorisimi soske nane pana agorisalile sa bukja ano Koridori 10. Aver bukja na čalavena pedo arakhipe dromutnipasko, ama musaj te agorisinenpe  soske pana pobuder te arakhenpe thaj te  sigurinenpe sa pozicie sar ani Grdelicaki klisura, adžahar ini ano kotor auto-dromesko kotar iklovipe kotar Sićevačko klisura. Thaj odola bukja ka oven ano sa akava berš. Ama odova so ano akava momenti džana, sito kaj dži akana ano lačardipe javinutno krangope Koridori 10 (E 80) kotar Niš dži Dimitrovgrad hardžisalo 485 milijojna evrja, a pedo lačardipe Mesmer krangope Koridori 10 (E 75) kotar Niš dži Preševo dži akana hardžisalo 630 milijojna evrja. Dendjum svato kaj ka dikhlarav sakova dinari thaj odova ini ka kerav”, phendja i Mihajlovićka.

 

Vakharipa kotar manglipe te anolpe specialno kanuni kotar infrastruktura, i Mihajlovićka phendja kaj numa jekh reso odole kanunesko sito te sigarolpe lačardipe, a odola save kerena kritika odova kerena soske nikana nane kerde buti ani infrastruktura.

 

“Jekh sebepi sito vaš anipe akale kanunesko a odova sito sigipe thaj čhinavipe bimanglutno našavipe vakhtesko. Pedo fundo džiavdisutne empirie, andjam klidutnipe kaj baro kotor vakhtesko našala ano agorisipe mangineske-juridikane relacie  pana so na iklona sa manglutne mukhlipaske lila vaš droma, pruge thaj aver. Thaj odova sine jekh kotar anglune sebepja so ačhova, a nanamen vakhti vaš fulinipe. Ministribe ano pere plajna vaš 2020. thaj avutne duj berša siole projektja molipa paše pondž milijarde evrja, kotar neve auto-dromja, pruge, sigutne dromutnikane, rehabilitacia 5.000 km regionalno thaj lokalno dromja. Sa siton odola projektja liniake infrastruktura save lačarenape ano lungipe kotar dešutne thaj šelutne kilometarja thaj ano disve milje katastarjenge parcele. Ini akava kanuni sito musaj vaš te sigara bukja, kotar procesi leipe phuvako, dži ikalipe musajutne mukhlipaske lila thaj sigipe publikake tenderja musajutne vaš realizacia akale projektjengo kotar semnibe vaš Srbiake. Nane aver sebepi”,phendja i Mihajlovićka.

 

Prekal olake lafja, lačardipe sitoj pana majbaro motori barjaripe Srbiako.

 

“Rezultatja lačardipaske ano 2019. berš siton lungaripe butberšengo trendi savo adžukhara ini ano 2020. berš, savo inicirisalo reforma ano lačardipe thaj poefikasno realizacia infrastrukturake projektja. Vaš odova Srbia avdive inati ani lumia kotar ikalipe elektronikake lačardimaske mukhlipaske lila. Molipe kerdime bukjengo ano lačardipe bajrilo kotar 2014. dži 2018 e 202 milijarde pedo 332 milijarde dinarja. Leipe kotor lačardimasko ano BDP bajrilo ano odova periodi e 3,2 šelestar pedo 4,5 šelestar, a ano 2019 ka nakhavol pondž šelestar. Numa ano trito kvartali 2019. sinamen baripe molipasko kerdime lačardimaske bukja kotar 40 šelestar, so sito majbaro baripe dži akana, a ka ovelamen ini pobaro baripe ano paluno kvartali. Ano oktobri palem pheravdjam rekordi pedo gendo ikalde lačardimaske mukhlipaske lila  ano jekh masek, dži 2.433! A ano sa 2019. berš ikaldile pobuder kotar  21.000 lačardimaske mukhlipaske lila”, phendja i Mihajlovićka.