RSS

You are here

Mihajlovićka: Propozalo Kaj Lačardimaske Thanutne Ando Putardipe Kerena Buti Uzo Maksimalno Uluvipe Bučarnengo

Telopresedentka Thagarutna Srbiaki thaj ministarka vaš lačardipe, dromutnipe thaj infrastruktura, prof. dr Zorana Mihajlović, phendja kaj uluvipe publikako sastipe ano vakhti avrirndomo situacia vaš bufljaripe korona virus majsemno prioriteti raštrako.

 

Dostuipa ano detharinesko programi TV Prva, Mihajlovićka kerdja apeli pedo dizutne pophureder kotar 65 berš ta na iklon kotar pere khera thaj apartmajna, a sa dizutne te pačavinen napja save anela Thagarutni Srbiaki thaj Ministribe sastipasko. 

 

Vakharipa kotar funkcionišipe dromutnipasko, transportesko thaj lačardimasko ano vakhti avrirndomo situacia, Mihajlovićka phendja kaj propozalo ministribasko  kote kaj šaj bukja te kerenpe ano lačardimaske thanutne ano putardipe, atoska, uzo maksimalno uluvipe bučarnengo ano rami e propozaljenca Thagarutnake.  

 

"Avdive ano efta majbare infrastrukturake lačardimaske thana sijamen angažuime paše 2.700 bučarne. Kinake kompanie ano akava momenti  kerena buti ano trujalutno drom trujal Beogradi, amerikake kompanie “Behtel” thaj “Enka” kerena buti ano lačardipe Moravako koridori thaj momentalno nane ačhavipe. Amaro propozalo sito  kompanienge kaj ini aver bučarnenge save kerena buti ano phando thanutnipe, te sine kaj šaj, te resen olenge te keren buti kotar kher”, phendja I Mihajlovićka. 

 

Telopresidentka Thagarutnaki phendja kaj maškharthemutno dromesko transporti ano thaj prekal Srbia funkcionišinela. 

 

"Transporti funkcionišinela ano akava momenti pharipa, ama funkcionišinela. Odova sito kotar vitalno semnipe sar dži ko amare dizutne, ama ini dizutne maškharutne phuvjengo, avela roba savo tradinelape kamiojnenca. Amen mukhlardjam maškharthemutno transporti, uzo vakhtesko limitiripe kotar 12 satja vaš dromesko tranziti prekal Srbia, thaj kotar odova vakhardilam e amare kolegenca kotar regioni sar bi o dizutne  te len manglutni roba. Kana sito pučhipe anipe robako ani Srbia, amare tradutne majangle avena ko than magacinesko, a palem nakhena ano sanitarno inspekcia”, phenela i Mihajlovićka.

 

Kana sito lafi kotar tradipe dizutnengo, Mihajlovićka phendja kaj ano vakhti avrirndipasko avrijalutne raštrutnenge na mukhelape khuvipe ani Srbia, dži amare raštrutne save avena kotar phuvja ano save si jagalutnipe korona virus nakhena ano karantini kotar 28 dive. Odova sito napi savi labarinelape ano sa samatrendake nakhavipe, sar ini ano aerodromja ano Beogradi thaj Niši.

 

"Ano karantini kotar 28 dive nakhena saren amare raštrune save avena kotar Švajcarija, Italia, Irani, Rumunia, Špania, Germania, Francia, Austria, Slovenia thaj Grecia. Amare raštrune save avena kotar aver phuvja ka oven ano korkoriizolacia 14 dive. Semno sito kaj akava te pačavinolpe, soske so pobut sijam disciplinuime odova ka ovol pošukhar sarenenge”, phendja voj.

 

Mihajlovićka phendja ini kaj po drom dži studio TV Prva dikhla kaj but po hari manuša sine ano mahale, ama si ini odola so na pačavinena napja save anela Thagarutni Srbia.

 

"Kerava apeli pedo amare dizutne kaj godaripe, disciplina thaj solidaripe but semne ano akava momenti sar vaš saren khupatne po lokhe te nakha akava pharo vakhti. So sito jekh masek prekal odova so ano dživdipe amen saren adžukharela”, dendja klidutnipe i Mihajlovićka.